Benefit Puff Off Gifts || هدايا بينفت لاطلاق باف اوف

اشحالكم يا حلوات؟ اليوم وصلتني هدايا من بينفت بمناسبة اطلاق منتج يديد عندهم واسمه باف اوف. بينزل المنتج في محلات وجوه حصريا بتاريخ ١٥/٠٢/٢٠١٥ وبينزل في محلات سيفورا من تاريخ ١/٠٣/٢٠١٥ 

وصلتني المنتجات اليوم واكيد بجرب المنتج اليديد باف اوف خلال هالفترة وبخبركم برايي فيه. والحين تعالو اراويكم شو اللي وصلني اليوم:

Puff Off Gel

هذا المنتج عبارة عن جل تحطين منه شوي تحت العين واتردين عليه بالراس اللي مثل شكل الكواي او اللي مسمينه Ironing Tip

يعني تكوين الخطوط الرفيعة او الانتفاخ اللي تحت العين. حبيت الفكرة وجاري التجربة.

Fake Up Concealer

الشي الثاني الحلو هو كونسيلر فيك اب، ميزته انه يرطب المنطقة اللي تحت العيون وخفيف يعني احس به مناسب لاستخدام يومي. انا جربته من قبل وكنت حابتنه.

Cheeky Coasters

 طبعا هالاشياء الظريفة انا وااايد احبها، هالحلوات ما اعرف اسمهم بالظبط بالعربي بس تعرفون الكوسترز او الاشيا اللي تحطينها تحت الكوب عشان ما يعلم ع الطاولة! هاذيلا هم بس طبعا انا بستخدمهم اكيد كديكور لتزيين ركن الميكاب اللي عندي لان خسارة هاذيلا بس احطهم للاكواب من جمااااالهم.

Makeup Bag

واخر شي شنطة الميكاب الجميييلة هاذي، وايد ذكرتني بستايل السبعينات او الثمانينات! حبيتها واكيد بستخدمها خصوصا للسفر.

Cosmetics Favourites Series : NARS || سلسلة المنتجات المفضلة عندي من ماركة: نارس

السلام عليكم ورحمة الله وبركاته.. اشحالكم يا حلوات؟؟

اليوم يابتلكم مفضلاتي من منتجات نارس، بما ان الماركة خلاص اتوفرت في سيفورا دبي في افرع دبي مول ومول الامارات ولقيت كل هالمنتجات عندهم، فقلت اتلكم عنها عشان تستفيدون من تجربتي وياها وهاذي المنتجات اللي افضلها من عندهم.

Foundations

-sheer glow foundation

-sheer matte foundation

-pure radiant tinted moisturizer

هاذيلا الثلاث انواع روووعه من نارس، الشير قلو للبشرة الجافة والشير مات للبشرة الدهنية. تغطيتهم من متوسطة الى كاملة حسب الطبقات وثباتهم وايد زين. استخدم فوقهم عادة اي بودرة حرة شفافة.

اما التينتد موسترايزر فهو نفس البي بي كريم يعني تغطيته خفيفة وعملي وايد خصوصا لاستخدام الصبح او اذا ما تحبين التغطية الثجيلة، ثابته ع الويه واتوقع يناسب كل انواع البشرات.

Concealers

-Radiant Creamy Concealer

-Concealer

هالنوعين رووعه من كونسيلرات نارس، الرادينت كريمي احس به ممتاز لمنطقة تحت العيون او الهالات اما الستيك لاحظت انه انسب للعلامات ع البشرة او الحبوب. انا اجيه استخدمهم وثباتهم ممتاز.

Eyeshadows

ايشدوهات نارس وااايد احبها وعندي منها كمية، بس ما جربت النوع اليديد اللي اسمه Dual Intensity وناوية اجربهم ان شاء الله. وكل الايشدوهات اللي عندي فرغتهم في علبة  Z-Palette لان جيه استخدمهم اكثر. واتعلمت طريقة تفريغ الايشدوهات من علبهم من اليوتيوب، بس كتبت How to depot NARS eyeshadow

وطلعت لي فيديوهات وااايده وبكذا طريقة.

Blushers

بلاشرات نارس جميلة وثباتها ممتاز ع الخدود واغلبها شيمر او بلمعه، عندي هاذيلا الثلاثة والباقي في الباليتات اللي تنزل ليمتد ايدشن.

Highlight

احلا اضاءة جربتها لين الحين هاذي الباترس. ثابته وقوية وتبين عدل ع البشرة. 

Contour 

هالعلبة فيها درجتين ممتازات للكونتور حق الدرجات الحنطية والسمرا. في منها بدرجات افتح بس هالدرجة وايد حبيتها لان ما عندي منها من اي ماركة ثانية.

Face Palettes

احب هالنوع من الباليتات لانها عملية وفيها كذا درجة سواء للبلاش او الهايلايت بس للاسف كلهم نفس البرونزر اللي لاقونا. ولو انا احب هالبرونزر واحس به نااااعم وطبيعي. عادة هالبالتات تنزل ليمتد ايدشن فاذا حصلتيها لا تفوتينها.

Lipsticks

-Audacious Lipstick

-Semi Matte Lipstick

-Satin Lip Pencil

-Velvet Matte Lip Pencil

يعني من الكمية اللي عندي اظن واضح اشكثر احب ارواج نارس، كلهم بمختلف تركيباتهم احبهم واستخدمهم حسب اللوك اللي حاطتنه. وموجودات هالانواع بالوان ودرجات مختلفة.

لشعر معطر وجميل

اشحالكم يا حلوات؟ اليوم بشاركم طريقتي في تعطير الشعر واتم الريحة الحلوة من غسلة للثانية، هاذي الطريقة ان شاء الله ما بتأذي شعرج ولا تسبب له تساقط او اطلع شعر ابيض. بس للعلم وهاذي طريقتي الخاصة اللي انا استخدمها.

ماسك تعطير الشعر

هاذي الماسكات ايدد شي في هالمجموعة يعني مب من زمان استخدمها والحمدالله ناسبت شعري، هاذي الماسكات طلبتها من تاجرة على الانستجرام 

http://instagram.com/jcspauae

وفعلا ريحة الشعر تكون حلوة مع هاذي الماسكات، استخدم الماسك عقب الشامبو في الشاور واخليه مدة ١٠ دقايق وعقب اغسله.

عطور فرنسية

هالعطور من من سنين استخدمهم وجميلين لتعطير الشعر يعني مصنوعين للشعر وعادة يسمونهم Hair Mest . استخدم من شانيل وجادور وعطر Herra hair perfume ، شانيل وديور اقوى من Herra hair perfume يعني انتي تختارين اذا تبين شي ريحته قويه او شي خفيف.

ارشهم ع الشعر وهو مبلول او ناشف عادي، ومافيهم كحول فما بطلع لج شعر ابيض.

عطور الشعر العربية

من سنين وانا استخدم هاذي العطور احط قطرة او قطرتين على ايدي وامسح بها على الشعر، اتم الريحة حلوة وثابته وافضل احطهم بعد ما ينشف الشعر.

من احلا العطور اللي احبهم من محلات عبدالصمد القرشي، و الياس الاسم الملكي للعطور . وبين فترة والثانية اجرب عطور يديدة من عندهم.

نصائح عن شراء المكياج واستخدامه

اشحالكم يا حلوات؟ موضوع اليوم مختصر بس وايد بنات يسألون عن المكياج وشو نشتري وشو نستخدم، وهل ناخذ كل شي يديد ينزل في السوق والا لأ..!! وهاذي مجموعة نقاط ونصايح اتمنى انها تفيدكم من تجربتي الشخصية:

هل اشتري مكياج يديد كل ما ينزل في السوق؟

أكييييييييد لا، اولا بتفلسين، ثانيا المكياج له تاريخ انتهاء يعني مب شي تخزنينه، دايما ختاري اللي انتي محتاجتنه او ناقصنج. نصيحتي لا تسيرين تشترين مكياج إلا مسويه عليه سيرج في النت، وشوفي المكياج اللي عندج فالبيت قبل. عقب اذا حسيتي انج محتاجه سيري اشتريه.

لان عدنا في الخليج ما يستوي تردين المكياج ع المحل عقب ما تشترينه يعني بيطيح في جبدج ان ما ناسبج!!

انزين ومكياج الليمتد ايدشن؟؟

اعرف ان الليمتد ايدشن وااايد حلو وشكله جميل خصوصا اللي ينزلون من ماك او من أغلب الماركات في موسم الاعياد. صدقوني اغلبهم مكررين من كل سنة يعني بس يتغير شكل العلب، فاول شي اتاكدي من المكياج اللي عندج، واذا بعدج حابه تشترين عشان مب قادرة تقاومين هالليمتد ايدشن فما عليه خذي عن خاطرج بس لا تشترين اللاين كاااامل، لا خذي قعطة او قطعتين بالكثير من هالمجموعة. بتوفرين على عمرج وبعد بتخلصينهم بدال ما اتكودين اشياء وايده مرة وحدة.

وايد عندي مكياج شو اسوي به؟؟

حتى لو المكياج اللي عندج كميته مب كبيرة، كل شهر ع الاقل سوي جرد لكل المكياج اللي عندج، صدقيني بتحصلين اشياء ما تستخدمينها او اشياء ناستنها في العلب. اللي ناستنه بتردين تستخدمينه اما اللي مب مناسبنج او ما تستخدمينه من زمان طلعيه، يا اما تعطينه اختج او صديقتج يعني اي حد تعرفين انها ع الاقل بتستخدمه، عقميه ونظفيه وعطيها اياه. واذا جديم فخلاص بتعقينه في الزبالة. ترا يكفي لو كل مرة طلعتي شيئين ثلاثة بتلاحظين نفسج انج تستخدمين كل المكياج اللي عندج.

غيري وايد يشترون مكياج ليش انا لأ؟؟

اذا انتي مب بيوتي بلوقر ولازم تجربين اشياء يديدة وتتكلمين عنها فصدقيني ما تحتاجين كل شي في السوق. وحتى يوم بتقرين ريفيوهات البنات ترا عشان تاخذين فكرة بس لا تسيرين على طول تشترين هالمنتجات وانتي عندج اشياء مثلها. وفري فلوسج احسن لج وهاذي نصيحة اخت تحبج.

وترا على فكرة اغلب البيوتي بلوقرز ما يشترون كل شي ينزل في السوق، لا غالبا ياخذون اللي يناسبهم.

احتار ما اعرف شو اشتري من المكياج!!

اختاري الاشياء اللي تناسبج وتحبين تستخدمينها دايما، طبعا عادي مرات تاخذين الوان مب متعوده عليها يعني حلو التغيير بس لاتغامرين في ماركات غالية، ع الاقل الارخص شوي ما بتزعلين عليه اذا ما ناسبج او ما حبيتيه. لكن نصيحتي يوم بتشترين خذي الالوان العملية اللي تناسبج وتناسب بشرتج، لا تعمتدين وايد على موضات المواسم، خذي فكرة عنها بس مب شرط تشترين الوان مثلا ايشدوهات ابدا ما تناسب لونج وتاخذين منها من كذا ماركة بس عشان انها موضة لموسم. وازني بين احتياجاتج وذوقج وموضة الموسم.

وآخر شي يا حلوات هاذي النصايح اوجهها لنفسي قبل ما اوجهها لكم، ولاني احبكم وتهموني حبيت اشاركم بها. واللي عندها اقتراحات ونصايح زيادة تكتبها في التعليقات تحت عشان الكل يستفيد بعد.

مفضلاتي من المكياج لعام ٢٠١٤ || Best Beauty Products 2014

السلام عليكم.. اشحالكم يا حلوات؟ كل عام وانتو بخير وفرح وسعادة يارب، وان شاء الله سنة ٢٠١٥ تكون حلوة عليكم وتتحقق فيها كل امانيكم.

اليوم يايبتلكم احلا المنتجات اللي جربتها خلال سنة ٢٠١٤ من المكياج، طبعا وااايد كان صعب عليي اني اختار من كل فئة منتج واحد لاني جربت اشياء وايدة، وان شاء الله هالاختيارات تفيدكم للي حابه تجربها، وعلى فكرة بشرتي عادية إلى مختلطة.

برايمر : Hourglass Veil Mineral Primer

من احلا الانواع اللي جربتها هذا البرايمر من اورجلاس، يعطي لوك حلو ومخملي للميكاب ويخليه ثابت طول اليوم، احس انه يناسب اغلب انواع البشرات. اشتريته من لندن بس موجود عند تاجرات الانستجرام سواء بهذا الحجم الكبير او الحجم الأصغر.

سي سي كريم: Bourjois 123 Perfect CC Cream

بالنسبة لي السي سي والبي بي كريم يعطوني نفس النتيجة، وهدا من بورجوا جميل، ثابت وفيه تغطية خفيفه يعني يوحد لون البشرة بدون ما يبين اني حاطه شي عليها. اشتريته من سنتر بوينت.

كريم أساس: Revlon Colorstay Foundation

تغطية هالفاونديشن من متوسطة إلى عالية وشي منه نوعين، نوع للبشرة الدهنية والثاني للبشرة الجافة. راااائع بمعنى الكلمة ومن يخلص اكيد برجع اشتريه. ثابت ع الويه ولا يتكسر وشكله طبيعي مب طبقة ثجيلة ع البشرة.

اشتريته من بوتس.

كونسيلر: NARS radiant creamy concealer

احلااااا كونسيلر لتغطية الهالات السودا تحت العيون، خفيف وما يتكتل وفي نفس يغطي عدل، انا حبيته اكثر من ماك برولونغ واحس انه عملي.

موجود في سيفورا دبي.

بودرة وجه: Dermablend Loose Setting Powder || Benefit Cosmetics Hello Flawless Powder

احب هالنوعين من البودرات سواء الحرة او المضغوطة، وهالاثنينه استخدمهم اما بروحهم او فوق الفاونديشن وثابتين طووول اليوم وما يبيون جيه طبقة ثجيلة ع الويه، بالعكس خفاف وناعمين.

ديرما بلند اطلبها من امازون اما بينفت فموجودة في سيفورا.

بودرة حواجب: Benefit Brow Zings

ممتازة هاذي الدرجة واللي هي ميديم، انا حواجبي سودا وغليظة بس احب افتحها شوي فاستخدم الواكس او الشمع قبل وعقب احط فوقة البودرة، تعطي شكل ناعم وطبيعي للحواجب.

موجودة في سيفورا.

باليت ايشدوهات: Too Faced Chocolate Bar Eye Shadow Collection

ايشدوهات توفيسد بشكل عام نوعيتها ممتازة، وهالباليت الحلو فيها انها الواني يعني هاذي الدرجات اللي احبها استخدمها دايما، ولاحظت حتى في السفر اشل وياي هالباليت من كثر ما احبها، تركيبة هالايشدوهات متنوعه ما بين المطفية واللي بلمعة.

موجودة في سيفورا.

ماسكارا: Le Volume de Chanel Mascara

بالنسبة لي من اصعب الاختيارات هي الماسكارا لاني احب استخدم اكثر عن نوع مرة وحده، بس لو بغيت استخدم نوع واحد بتكون هاذي من شانيل لانها تعطي غلظ وطول للرموش وتفرقهم عن بعض. واخر اليوم امسحها بسهولة باي ميكاب ريموفر.

جل لاينر وايلاينر:  KIKO Lasting Gel Eyeliner || Sephora Liquid Eyeliner  

جل لاينر من كيكو وايلاينر عادي من سيفورا، هالاثنينه وايد حبيتهم هالسنة لان سوادهم قوي وثابتين ع العين. وسهلين في الرسم يعني لو انتي مبتدئة او متعودة على الايلاينر اي واحد من هالنوعين بيناسبونج.

كيكو خذته من لندن وشفته عند تاجرات الانستجرام اما الايلانر فموجود في سيفورا.

برونزر: Laura Mercier's Baked Blush Bronze in Ritual 

للاسف ان هالبرونز ليمتد ايدشن من لورا مارسيه، وايد حبيته لان لونه قوي بس يتوزع بسهولة ع البشرة وفيه لمعة خفييييفه تخلي الويه جيه فرش.

بلاش: Charlotte Tilbury  Cheek To Chic  Blushes In Sex On Fire

الحلو في هالبلاش من شارلوت تيلبري انه لونين مع بعض، مرات اخلطهم واستخدمهم مرة وحده ومرات استخدم لون واحد بس، حسب اللوك اللي حاطتنه وثبات هالبلاش طول اليوم واللون قوي.

اضاءة: Bobbi Brown Apricot Shimmer Brick Compact

اضادات بوبي براون بشكل عام حلوة، وهاذي اكثر وحده استخدمها من بينهم. مناسبة للبنات اللي بشرتهم حنطية مثلي. مرات اخلط الالوان كلها مع بعض ومرات لا بس استخدم لونين حسب مزاجي وفي كل الحالات النتيجة ممتازة.

محدد شفايف: MAC Lipliner in Soar

هالسنة رديت استخدم محددات الشفايف لان لاحظت ان الروج يثبت لفترة اطول لو تحته محدد او مرات استخدم المحدد خصوصا هذا بروحه وشكله واااايد طبيعي وحلو ومال استخدام يومي.

روج: Too Faced Melted Liquified Long Wear Lipstick in Melted Berry 

هالارواج من توفيسد جمييييلة وثابته ع الشفايف وما تتكسر او تتجمع في مكان واحد، بس لازم استخدم قبلها مرطب شفايف واتم ثابت والوانهم حلوة لكن هذا اللون بالذات واايد احبه ويوم احطه خواتي وكمن وحده من صديقاتي يقولون لي انه مناسبني فمن جيه ادمنت عليه!!

قلوس: Marc Jacobs Lust for Lacquer Sheer Lip Gloss in Fame

انا مب وايد ويا القلوسات يعني ما استخدمها بشكل دايم بس هالقلوس من مارك جاكوبس غيرت نظرتي للقلوسات لان تركيز اللون فيه ممتاز ويثبت وقت طويل، وعلى فكرة استخدمه بروحه مب ويا روج ويطلع واااضح ع الشفايف.

اشتريته من سيفورا.

فرشاة الفاونديشن وفرشاة البودرة: Sigma 3DHD Brush || Sephora Pro Flawless Bronzer Brush #46

هالفرشاتين وااايد سهلو عليي وضع الميكاب وتوزيعه بدون ما يتكتل سواء الفاونديشن السائل او البودرة، مالت سيجما تعطي نفس نتيجة فرشاتهم الكابوكي إف ٨٠ بس هاذي اسرع واسهل في توزيع الفاونديشن، اما مالت سيفورا فما تخلي البودرة تتكتل بالعكس توزيعها بطريقة مرتبة.