تجربتي مع منتجات L'Oreal Revitalift Filler HA

اشحالكم يا حلوات؟ موضوع اليوم عن منتجين يداد من لوريال، نزلو مؤخرا في السوق ولوريال طرشولي هالمنتجات عشان اجربهم. كلهم للبشره بس واحد كريم والثاني سيروم بصراحه واحد منهم حبيته وناسبني والثاني ما شفت له نتايج ملحوظه! طبعا انا اتكلم من خلال تجربتي الشخصية ويا هالمنتجات اللي استخدمتها لمدة شهر ونص تقريبا، ومب شرط اللي ياناسبني يناسب غيري والعكس صحيح. 

بشرتي من عادية إلى مختلطة وحساسه، بين فترة والثانية تطلع لي حبوب بسيطه واحيانا هاذي الحبوب تخلي اثر! فغالبا احب استخدم المنتجات اللي توحد لون الشرة وتنعشها وتعطيها حيويه. فباختصار تعالو اخبركم عن رايي في منتجات لوريال!

REVITALIFT FILLER FILLER HA REVOLUMISING SERUM

هذا السيروم هو اللي ما حبيته وما حسيت انه عطاني نتايج واضحه! حسيت انه شوي جفف لي بشرتي وفي نفس الوقت ما لاحظت ان اثر عليها بشكل ايجابي، يعني انا ما عندي خطوط واضحه على البشره فما حسيت ان ساعد بشرتي. وما اعتقد ان ممكن اشتريه.

ANTI-AGEING DAY MOISTURISER REVITALIFT FILLER

أما الكريم فهذا اللي حبيته وواظبت على استخدامه. لاحظت ان يعطي البشرة نضارة اكثر وشوي شدها وخلاها منتعشه. خفيف وبسرعه تمتصه البشرة. من ناحية توحيد لون البشرة فهو ما سوى شي بس اصلا مب مذكور على العلبة ان يوحد لون البشره. 

هذا الكريم استخدمته نهار وليل وتقريبا خلصت اكثر من نصه وممكن ارجع اشتريه لان ناسبني.

طبعا منتجات لوريال متوفرة في السوبرماركت و اتوقع الصيدليات مثل بوتس.

هذا رأيي باختصار في منتجات لوريال اليديده، واللي جربتهم اتمنى تشاركنا بتجربتها سواء هني على المدونة او على الانستجرام.

مجموعة البورفشنال الجديدة من بينفت || Benefit PorFessional Collection

اشحالكم يا حلوات؟ اليوم بخبرم عن تجربتي مع مجموعة بينفت اليديده من البورفشنال. هالمجموعة موجودة حاليا في سيفورا الإمارات واتوقع انها نزلت ف الخليج.

المجموعة فيها ثلاث منتجات، واحد موجود من قبل واثنينه اول مرة ينزلونهم. والمجموعه تشتغل على المسام اللي على البشرة، يعني تساعد انها تخفف من شكل المسام الواضحه. خل اخبركم عنهم بالتفصيل.

The POREfessional Face Primer

هذا البرايمر اعتقد من انه من اول انواع البرايمرات اللي جربتها، ولين الحين ارجع له لان فعلا يساعد على تصغير شكل المسام ويعطي شكل املس للبشرة، واحيانا استخدمه بعد تحت الكونسير حوالين العين لان يساعد على تخفيف مظهر الخطوط الرفيعه في هالمنطقة. طبعا هذا المنتج اللي موجود في بنفت من قبل وضافوه في هالمجموعه لان وايد من البنات يحبونه ويستخدمونه.

The POREfessional matte rescue mattifying gel 

هذا اكثر منتج اتحمست اني اجربه اول ما نزل، لان تركيبته عباره عن جل فيعني اخف شوي من البرايمر القديم لان هذاك كريم.

المفروض انه يخفف من افرازات الدهون ويصغر من شكل المسامات واحلا ما فيه ان تركيبته ما فيها سيلكون.

مرات كنت احبه ومرات لا، لاحظت انه يختلف تأثيره على حسب الفاونديشن اللي استخدمه، يعني اذا استخدم فوق فاونديشن مات او مطفي فاتم منطقة حوالين الانف خاليه من الدهون، لان هاذي المنطقة اللي ادهن شوي في ويهي.

اما اذا كان الفاونديشن بلمعه فلا هالجل ما الاحظ انه يشتغل عدل!

لكن في كل الحالات يثبت الفاونديشن لفترة طويله ولا حسست بشرتي منه.

The POREfessional instant wipeout facial masks

اوكي هذا عبارة عن سائل في علبة بلاسيتك صغيرة، تضغطين شوي عالعلبة عشان تتحرر الحبيبات اللي داخلها وتختلط بالسائل وعقب تفتحينها. وقطعه تغطينها في السائل وعقب تمدينها على الانف والخد، يعني المناطق اللي فيها المسام تكون عادة وضحه، تحطين القطعه من الجهة الناعمة وتخلينها عشر دقايق وتشلينها وتمسحين الباقي من الجهة الخشنه. وعقب عادي ترومن تحطين البرايمر ومكياجج.

حبيت فكرة الماسك وتأثيره تجميلي مؤقت، يعني اذا عندج مناسبه او بتحطين ميكاب وايد فبينفعج هالماسك، والعلبه فيها ثمان حبات يعني كمية مناسبه. ولاحظت ان فعلا خفف من شكل المسام الواضحة.

هاذي كانت المجموعه بالكامل. اذا بتسالوني شو الشي اللي وايد حبيته من المجموعة وانصح به فهو الجل برايمر لانه خفيف وفي نفس الوقت يصغر من شكل المسام.
واللي جربت اي شي من هالمنتجات يا حلوات يا ليت تشاركنا بتجربتها!!

Scholl Velvet Smooth Express Pedi.. شول فيلفيت سموث إكسبريس بيدي

اشحالكم ياحلوات؟ اليوم بخبركم عن جهاز يديد من ماركة شول لتنعيم الاقدام. هذا جهاز يساعد ان يشل طبقة الجلد الميت من الاقدام ومع الاستخدام بانتظام بتلاحظين ان اقدامج وااايد انعم.

http://www.schollvelvetsmooth.com/

الجهاز عبارة عن

راس يتغير كل مدة، يعني اتوقع كل كمن شهر المفروض تغيرينه- 

-الجهاز نفسه، فيه مثل المقبض في النص يسهل استخدامه، وجهاز التشغيل في نص هالمقبظ-

-تحتاجين بطاريات AA  عشان تشغلين الجهاز

طريقة استخدامه

جدا سهلة وما ياخذ اكثر من خمس دقايق.. اغسلي الاقدام باي صاوبن او غسول جسم، جففيها، وشغلي الجهاز. مرريه على الاقدام من الخلف للامام كذا مرة.. يعني مرتين ثلاث كفاية، ورطبي الاقدام باي مرطب عندج.

انا استخدمه مرة ف الاسبوع لان احس يكفي، اما اذا عندج جلد ميت وايد فاظن تحتاجين مرتين اول كمن اسبوع، بس بعدين خلاص تكفي مرة وحدة.

ممتاز الجهاز واحس انه عملي وسريع ويغني عن اجهزة الباديكير الكبيرة، من وجهة نظري طبعا.

موجود في اغلب الصيدليات اللي تبيع منتجات شول. وفي منه هدايا لخمسة فايزين من اللي بيحظرون اطلاق هذا الجهاز بتاريخ ١٧/٤/٢٠١٥ في الجي بي ار، لا يفوووتكم.

كيف تلفلفين شعرج !! How to Curl your Hair

اشحالكم يا حلوات؟ موضوع اليوم عن كيرلي الشعر والطريقة الاسهل انج تسوين الكيرليات. 

انا اشتريت هالكيرلر من ماركة جوز ايبر وموجود الكشك مالهم في مردف ستي سنتر دبي، اظن سعره بحدود ال٣٠٠ درهم.

Heat protectant for hair

اهم نقطة قبل لا تلفلفين الشعر وتعرضينه للحرارة انج تستخدمين كريم او جل مخصص لحماية الشعر من السشوار والكيرلر، عشان ما يخترب شعرج ع المدى الطويل. انا افضل استخدم هذا الجل اللي فالصورة، احط شي بسيط منه عالشعر وعقب استخدم الكيرلر. اشتريت الجل من محل بوتس.

jose eber hair curling iron

طبعا هالجهاز موجود من ماركات وايده وباحجام مختلفة، انا افضل هذا اللي ف الصورة ومقاسه 25mm يعني يعطي كيرليات كبيرة، ممكن تستخدمين اي حجم حسب اللي تحبينه.

الشعر تقسمينه، وعقب تلفلفين خصلة على برع والخصلة الثانية على داخل، يعني ما يكون التلفليف باتجاه واحده، لا كل خصلة او مجموعة خصلات عكس الثانية عشان تطلع التلفليفات احلا وطبيعية اكثر.

حطيت لكم طريقة استخدام الكيرلر وهالصورة خذتها من النت بتحصلونها في هذا الرابط

http://fashion.ekstrax.com/2014/12/how-to-curl-your-hair-learn-with-these-simple-steps-and-tips.html

قفاز اليد

عادة يكون موجود في علبة الكيرلر وووووايد مهم انج تلبسينه لان الكيرلر يكون حار ويحرق اليد، اقولكم عن تجربة!!

وللاسف ما عندي فكرة وين ينباع هالقفاز.

تجربتي مع علاج بوتكس الشعر || Hair Botox Treatment

اشحالكم ياحلوات؟ من كمن اسبوع خبرتكم ع الانستجرام عن تجربتي مع بوتكس الشعر واللي سويته في ويا صالون @beautystationuae بس كانت الخدمة منزلية.

طبيعة شعري ناعم وخفيف بس مافيه حيوية من جيه اتحمست اني اسوي هذا العلاج، حسب اللي قريته عنه انه علاج طبيعي مكون من بروتين وفيتامينات تغطي الشعر وتعطي كثافة وحيويه وتعالج القشرة والتساقط، وهو مناسب للي تعاني من جفاف شعرها او تلفه خصوصا من الصبغات.

المهم سويت العلاج في البيت وكان على خمس مراحل:

-غسل الشعر بالشامبو المخصص للبوتكس.

-وضع علاج البوتكس او الكريم وتوزيعه عل الشعر كله، من الجذور للاطراف، وخلته العاملة على الشعر مدة ساعتين.

-غسل الشعر بس بدون شامبو، مجرد تنظيفه بالماي من كريم البوتكس.

-تنشيف الشعر بالسشوار.

-كوي الشعر وفرده بالهير ستريتنر او كواي الشعر، وكانت العاملة تقسم الشعر وتمرر الهير ستريتنر على كل قسم من الشعر.

العلاج كله ياخذ حوالي ثلاث الى اربع ساعات ويعتمد على طول الشعر، وتخلينه يومين بدون غسيل من عقب العلاج وعقب خلاص عادي تغسلينه.

طبعا في شامبو وبلسم وماسك مخصصين لعلاج البوتكس وممكن تاخذينهم من الصالون عشان يحافظون على نتيجة العلاج لاطول فترة، او تستخدمين المنتجات اللي تناسبج من شامبو وبلسم وماسك من السوبرماركت. وعادة العلاج تعيدينه كل ست شهور او اقل حسب حاجة شعرج.

في النهاية من خلال تجربتي وااايد انصح به البوتكس لانه فعلا يرد للشعر حيويته وبالنسبة لي وقف التساقط وعقب ما سويته حسيت ان شعري احلا، واذا طبيعة شعرج كيرلي بيرد عقب فترة كيرلي بس بدون نفشه يعني جيه كيرليات حلوة ومرتبه كانج مسوتنه ف الصالون. بالنسبة لي حسيت ان العلاج مناسب لكل انواع الشعر مب بس الكيرلي لان شفت وايد من صديقاتي مسوينه مع اختلاف انواع شعورهم. وانا شعري ناعم ومع ذلك سويته.

لا تتوقعين تغيير جذري في طبيعة شعرج لا، بيتم مثل ماهو بس صحي اكثر وشكله ارتب واجمل.

لشعر معطر وجميل

اشحالكم يا حلوات؟ اليوم بشاركم طريقتي في تعطير الشعر واتم الريحة الحلوة من غسلة للثانية، هاذي الطريقة ان شاء الله ما بتأذي شعرج ولا تسبب له تساقط او اطلع شعر ابيض. بس للعلم وهاذي طريقتي الخاصة اللي انا استخدمها.

ماسك تعطير الشعر

هاذي الماسكات ايدد شي في هالمجموعة يعني مب من زمان استخدمها والحمدالله ناسبت شعري، هاذي الماسكات طلبتها من تاجرة على الانستجرام 

http://instagram.com/jcspauae

وفعلا ريحة الشعر تكون حلوة مع هاذي الماسكات، استخدم الماسك عقب الشامبو في الشاور واخليه مدة ١٠ دقايق وعقب اغسله.

عطور فرنسية

هالعطور من من سنين استخدمهم وجميلين لتعطير الشعر يعني مصنوعين للشعر وعادة يسمونهم Hair Mest . استخدم من شانيل وجادور وعطر Herra hair perfume ، شانيل وديور اقوى من Herra hair perfume يعني انتي تختارين اذا تبين شي ريحته قويه او شي خفيف.

ارشهم ع الشعر وهو مبلول او ناشف عادي، ومافيهم كحول فما بطلع لج شعر ابيض.

عطور الشعر العربية

من سنين وانا استخدم هاذي العطور احط قطرة او قطرتين على ايدي وامسح بها على الشعر، اتم الريحة حلوة وثابته وافضل احطهم بعد ما ينشف الشعر.

من احلا العطور اللي احبهم من محلات عبدالصمد القرشي، و الياس الاسم الملكي للعطور . وبين فترة والثانية اجرب عطور يديدة من عندهم.

نصائح عن شراء المكياج واستخدامه

اشحالكم يا حلوات؟ موضوع اليوم مختصر بس وايد بنات يسألون عن المكياج وشو نشتري وشو نستخدم، وهل ناخذ كل شي يديد ينزل في السوق والا لأ..!! وهاذي مجموعة نقاط ونصايح اتمنى انها تفيدكم من تجربتي الشخصية:

هل اشتري مكياج يديد كل ما ينزل في السوق؟

أكييييييييد لا، اولا بتفلسين، ثانيا المكياج له تاريخ انتهاء يعني مب شي تخزنينه، دايما ختاري اللي انتي محتاجتنه او ناقصنج. نصيحتي لا تسيرين تشترين مكياج إلا مسويه عليه سيرج في النت، وشوفي المكياج اللي عندج فالبيت قبل. عقب اذا حسيتي انج محتاجه سيري اشتريه.

لان عدنا في الخليج ما يستوي تردين المكياج ع المحل عقب ما تشترينه يعني بيطيح في جبدج ان ما ناسبج!!

انزين ومكياج الليمتد ايدشن؟؟

اعرف ان الليمتد ايدشن وااايد حلو وشكله جميل خصوصا اللي ينزلون من ماك او من أغلب الماركات في موسم الاعياد. صدقوني اغلبهم مكررين من كل سنة يعني بس يتغير شكل العلب، فاول شي اتاكدي من المكياج اللي عندج، واذا بعدج حابه تشترين عشان مب قادرة تقاومين هالليمتد ايدشن فما عليه خذي عن خاطرج بس لا تشترين اللاين كاااامل، لا خذي قعطة او قطعتين بالكثير من هالمجموعة. بتوفرين على عمرج وبعد بتخلصينهم بدال ما اتكودين اشياء وايده مرة وحدة.

وايد عندي مكياج شو اسوي به؟؟

حتى لو المكياج اللي عندج كميته مب كبيرة، كل شهر ع الاقل سوي جرد لكل المكياج اللي عندج، صدقيني بتحصلين اشياء ما تستخدمينها او اشياء ناستنها في العلب. اللي ناستنه بتردين تستخدمينه اما اللي مب مناسبنج او ما تستخدمينه من زمان طلعيه، يا اما تعطينه اختج او صديقتج يعني اي حد تعرفين انها ع الاقل بتستخدمه، عقميه ونظفيه وعطيها اياه. واذا جديم فخلاص بتعقينه في الزبالة. ترا يكفي لو كل مرة طلعتي شيئين ثلاثة بتلاحظين نفسج انج تستخدمين كل المكياج اللي عندج.

غيري وايد يشترون مكياج ليش انا لأ؟؟

اذا انتي مب بيوتي بلوقر ولازم تجربين اشياء يديدة وتتكلمين عنها فصدقيني ما تحتاجين كل شي في السوق. وحتى يوم بتقرين ريفيوهات البنات ترا عشان تاخذين فكرة بس لا تسيرين على طول تشترين هالمنتجات وانتي عندج اشياء مثلها. وفري فلوسج احسن لج وهاذي نصيحة اخت تحبج.

وترا على فكرة اغلب البيوتي بلوقرز ما يشترون كل شي ينزل في السوق، لا غالبا ياخذون اللي يناسبهم.

احتار ما اعرف شو اشتري من المكياج!!

اختاري الاشياء اللي تناسبج وتحبين تستخدمينها دايما، طبعا عادي مرات تاخذين الوان مب متعوده عليها يعني حلو التغيير بس لاتغامرين في ماركات غالية، ع الاقل الارخص شوي ما بتزعلين عليه اذا ما ناسبج او ما حبيتيه. لكن نصيحتي يوم بتشترين خذي الالوان العملية اللي تناسبج وتناسب بشرتج، لا تعمتدين وايد على موضات المواسم، خذي فكرة عنها بس مب شرط تشترين الوان مثلا ايشدوهات ابدا ما تناسب لونج وتاخذين منها من كذا ماركة بس عشان انها موضة لموسم. وازني بين احتياجاتج وذوقج وموضة الموسم.

وآخر شي يا حلوات هاذي النصايح اوجهها لنفسي قبل ما اوجهها لكم، ولاني احبكم وتهموني حبيت اشاركم بها. واللي عندها اقتراحات ونصايح زيادة تكتبها في التعليقات تحت عشان الكل يستفيد بعد.

مجموعة سيجما كولور بوب باللون المشمشي || Sigma Beauty Color Pop andBrush Set - Pretty in Peach Collection

السلام عليكم. اليوم بكلمكم بالتفصيل عن مجموعة كولور بوب من سيجما واللي لونها مشمشي ورايي فيها.

انا طلبتها مرتين، مرة من موقع ليلام 

http://www.laylam.ae/store/beauty-products/sigma-brushes/pretty-in-peach.html

ومرة من موقع سيجما واستخدمت كود الخصم ١٠٪ اللي كل شهر احطه ع اليمين في المدونة.

http://www.sigmabeauty.com/?Click=689204

هاذي المجموعة كلها بدرجات المشمشي واللي وايد واي احبها، وبعد طلبت الثلاث فرش واللي عندي منها من قبل بس طلبت زيادة لان احتاجها خصوصا للسفر ولان سعرها نازل ومب دايما احصل الفرش بها السعر.

العلبة الأساسية:-

2 Eye Shadows: Tangy, Fresh-

العلبة هاذي البيضا فيها لونين ايشدو، شكلهم وااايد حلو في العلبة واتوقعت انهم حلوين ع الجفون، بس للاسف هالالوان ابدا ما بينت مع اني حطيت تحتهم برايمر بس البيقمنتيشن او تركيز الالوان وايد ضعيف، وما يتوزعون بسهولة حسيت ان بودرتهم تتراكم ما اعرف كيف!! ابدا ما حبيتهم.

-Halo Dust: Juicy

هذا بيقمنت لونه مشمشي غامج وفيه لمعة ذهبية، جميييييل اللون ومركز عكس الايشدو ويتوزع بسهولة ع الجفون. وايد حبيته.

-Spotlight Powder: Sweet Thing

البودرة هاذي استخدمتها كبلاش وهايلات في نفس الوقت، لان لونها ناعم وفيها لمعة خفيفة بس ثابته ع الويه. احس بها ممتازة حق ميكاب ناعم.

-Lip Gloss: Saucy

بشكل عام انا مب وايد ويا القلوسات لانها بسرعة تخف وتختفي من على الشفايف وما احب كل شوي اعيد عليهم، بس هالقلوس حبيته!! فيه لمعة قوية ولونه واضح وثباته وايد زين يعني يطول ع الشفايف، حبيت تركيبته وتحمست اجرب قلوسات سيجما.

الفرش:-

-E55 – Eye Shading

هاذي الفرشاة اساسية للايشدو اللي ينحط علي الجفن تحت الكريس، ما اعرف شو اسمه بس حق توزيع اللون ع الجفن كله.

-F40 – Contour

فرشاة الكونتور هاذي عندي منها ٢ ومع ذلك طلبت منها لانها ممتازة سواء للكونتور او البلاش او حتى للهايلات، وتنظيفها سهل وتعيش وما يطيح شعرها. وبعدين لونها الوردي هذا يجننننننن!!

-E25 – Blending

من أحسن الفرش حق الدمج وتذكرني بفرشاة ماك ٢١٧، ونوعيتها طبعا ممتااااااازة.

مكياج الدوام والجامعة

بما ان هذه الفترة ستبدأ الدراسة وانتهت الاجازة الصيفية فاحببت ان اشارككم ببعض المقترحات التي تناسب لمكياج خفيف وعملي ويمكن وضعه في خمس دقائق في خطوات بسيطة ومختصرة.

البي بي كريم او التينتد موسترايزر

يمكنك استخدام احد هذه الانواع حيث ان البي بي كريم او التينتد موسترايزر سهل في التوزيع ويعطي توحيد خفيف للون البشرة ومظهر انعم لها. وحسب نوع بشرتك يمكنك استخدام النوع المناسب. من احلا الانواع التي جربتها لهذه الكريمات هي:

-كلارنس بي بي كريم وهو مناسب للبشرة العادية. 

-لورا مارسيه تنند موسترايزر وهو مناسب للبشرة الجافة او الدهنية حيث يوجد منه نوعين.

الماسكارا

وهي مهمة لتضفي بعض النشاط للوجه، ويمكنك استخدام ماسكارا عادية لتمشط الرموش بدون ان تكتلها. مقترحاتي لهذه النوعية هي احدى ماسكارات ميبلين المتنوعة وذلك حسب حاجتك حيث باختلاف شكل الفرشاة يختلف الغرض من هذه الماسكارا.

الحواجب

يمكنك تمشيطها واستخدام بعض البودرة التي تظهر الحواجب بمظهر مشرق ومنعش صباحا. افضل البودرة حيث انها تبدو طبيعة اكثر من الجل او القلم. ومن اجمل الانواع التي جربتها هب بودرة بودي شوب.

بودرة الخدود

اكتفي بها ولا تحتاجين إلى الكونتور او تحديد الوجه او ضافة الاضاءة على الوجه. يمكنك استخدام البلاش الاقرب إلى لون بشرتك ومن اجمل البلاشرات التي جربتها هي المطفية من ماك، او المطفية من لوريال.

الروج المرطب

والذي يعتبر مرطب للشفاه بلون خفيف طبيعي. اذا احببتي تجربة مثل هذه الانواع يمكن استخدام الليب بالم من ريفلون والذي يوجد بألوان كثيرة وجميلة.

مكياج السفر || Travel Makeup

بما انه موسم السفر فاحببت ان اشاركم باقتراحات لمنتجات يمكن ان تاخذينها معك للسفر. والقاعدة الاساسية بالنسبة لي هي التقليل من كمية المكياج للحد من الخطوات الكثيرة اثناء وضعه. بشكل عام الغاية من السفر هي التغيير ويمكنك مثلا ان تكتفي مرات بالكونسيلر والبودة والماسكارا لشكل طبيعي، واحيانا يمكنك استخدام مكياج كامل لمظهر انيق. كل ذلك يعتمد علـى الذوق الشخصي، وهذه مجرد مقترحات.

البرايمر

احب استخدامه حتى لو وضعت فقط بي بي كريم حيث انه يساعد على حفظ ترطيب البشرة وفي نفس الوقت يثبت المكياج. اخترت نوعين احدهما لمظهر مطفي والاخر لمظهر اكثر لمعة:

-بورفشنال من بينيفت لمظهر مطفي.

-برايمر لوا مارسيه للبشرة الجافة. لمظهر اكثر لمعة.

الفاونديشن

لاستخدام خفيف وطبيعي فضلت السي سي كريم من بيور، ولقد تكلمت عنه بالتفصيل على الانستجرام حيث تغطيته خفيفه وثباته ممتاز، اما لتغطية اكبر فاخترت العزيز على قلبي ريفلون كلر ستاي وهو الاخر تكلمت عنه سابقا وبالنسبة لي ثباته رائع.

الكونسيلر والكوركتر

هذا الكوركتر من ماك وهو بلون برتقالي حيث تركيبته خفيفه جدا، احيانا اكتفي به واثبته بالقليل من البودة فقط للتخفيف من حده الهالات السوداء، ولتغطية اكبر او اثقل بالطبع استخدم فوقه ماك برو لونغ.

البودرة

ايضا بالنسبة للبودرة فاخترت ذات التغطية الخفيفة من ماك مينرالز سكن فينش ناتوشرال. اما للتغطية الكاملة فالبودرة التي اخترتها هي من الانواع الجديدة واحببتها كثيرا، اسم الماركة فلورمار وهي ماركة تركية ممتازة وساتكلم عنها بالتفصيل قريبا على الانستجرام.

الايشدو

اخترت علبتين وهما عمليتين جدا، الاولى لوراك برو ٢ وبها الوان ترابية والوان قوية اما الباليت الثانية فهي ليمتد ايدشن من ماك نزلت العام الماضي وهي بالوان ناعمة ايضا.

الماسكارا

حاولت قدر الامكان ان اقلل من عدد الماسكارا التي اخذتها معي وذلك لاني احب ان استخدم اكثر من نوع، وحصرتها هذه المرة بسكاندل ايز من ريميل، ثي ار ريل من بينفت، ولي فوليوم من شانيل.

الحواجب

اخترت عدة منتجات من باب التنويع بين البودرة من كيكو، والقلم من شارلوت تيلبري والماسكارا من ماك.

الايلاينر

اخترت جل ايلاينر بلون بنفسجي غامق من ماك حيث يعطي خطا ناعما وجميلا واقل حدة من اللون الاسود، اما للاقلام فاتخترت الاسود من ميلاني، الازرق من ايربن ديكاي والاخضر من ماك.

البرونزر، الهايلات، البلاش

هذه المنتجات اخترتها من علبتين، الاولى من تو فيسد وهي بونجور سوليل وبها البرونزر والهايلات، اما العلبة الثانية فهي من سليك وبها البلاشر وهايلايت ايضا.

الروج

اخترت الالوان الناعمة الهادئة حيث من النادر ان استخدم في السفر الوانا صارخة، اخترت الالوان التي تتدرج ما بين الوردي واللحمي وهي من كيكو، توم فودر، وماك. اما القلوس فهو من ماك

الفرش الأساسية الجزء الثاني || فرش العيون

السلام عليكم، اشحالكم يا حلوات؟

اليوم يايبتلكم الجزء الثاني من الفرش الاساسية اللي اتوقع تناسب المبتدئاتي في المكياج او اللي محتاجة عدد قليل لاستخدام يومي او للسفر.

Mac 204

هاذي الفرشاة لتمشيط الحواجب قبل لا تستخدمين الجل او البودرة، وعقب ما توزعين المنتج ع الحواجب ترجعين تمشطينهم بهالفرشاة. في منها في كذا ماركة مب شرط ماك.

Sigma Eye Shading E55

ممتازة هاذي الفرشاة لتوزيع اللون الاساسي على الجفن المتحرك او اذا حاطه لون واحد عالجفن كله. تعيبني اللي من سيجما لانها عندي من زما وبعدها ماتغير ولا تأثرت بكثرة الاستخدام والتنظيف.

Zoeva 227 Luxe Soft Definer

انا حب استخدم هالنوع من الفرش لتمويه اطراف الايشدو بحيث يبين مدرج اللون ومب خط واضح، في منها بعد في ماك ونفس الشكل والكوالتي ورقمها 217

BH Cosmatics

هالفرشاة موجودة من ضمن مجموعة كاملة من بي اتش كوزماتيكس ، بحط لكم رابط هالمجموعة.

http://www.bhcosmetics.com/products/10pcs-pop-art-brush-set

ميزتها انها تسهل رسمة الفي V على طرف العين، خصوصا يوم تبين تعطين هالشكل المسحوب للعين فهاذي الفرشاة المقوسة عملية لها الشي.

MAC 219SE

احب استخدم هالفرشاة لتوزيع الايشدو على خط الرموش السفلية لانها توزعه بسهوله وتموهه في نفس الوقت. اعتقد هاذي كانت ضمن مجموعة في وحده من كولكشنات ماك بس بعد موجودة بروحها في ماك او اي ماركة ثانية.

Sigma Eyeliner E05

بالنسبة لي هاذي من احسن الفرش اللي استخدمها للجل ايلانر، وايد تسهل علي الرسمه اللي ابغيها سواء ثجيلة او رفيعة.