اشحالكم يا حلوات؟ اليوم بعرضل لك أحسن ٣ فاونديشنات أو كريم اساس للاستخدام اليومي لان تغطيتهم خفيفة وممكن تبنينها لمتوسطة وحاليا انا مغرمة بهالثلاثه !! حسيت انها تناسب البشرات من العادية إلى الدهنية وحتى الجافة ممكن تناسبها بس تحتاج قبلها لترطيب، لكن ما تناسب هالكريمات البشرات الجافة جدا. شي ثاني: هالفاونديشنات حلوة اذا تستخدمينها بروحها بس اذا عندج علامات او هالات تحت العيون ممكن تحطين فوقها شوية كونسيلر وتثبتينه ببودرة حرة ويطلع شكل الميكاج نظيف وناعم.
LOreal Paris Nude Magique Eau De Teint , 140 PURE BEIGE
كريم الاساس هذا من لوريال وأساسه الماي يعني تركيبته واااايد خفيفه وممكن تحطين كذا طبقة منه فوق بعض بدون ما يتراكم او يبين انه كيكي! هذا اخف نوع من بين الثلاثة اللي في هالموضوع واحب استخدمه خصوصا يوم تكون بشرتي مرتاحه وما احتاج لتغطية ثجيلة.
Lancome Miracle Air de Teint, 03 Beige Diaphane
فاونديشن من لانكوم جمييييل وتغطيته خفيفه لدرجة تحسين انه بشرتج مخملية وناعمه بس ما تبين عليها طبقة كريم الاساس، حسيت انه مثالي لفترة الشتاء بس حتى في الصيف كان حلو.
Maybelline Fit Me Shine Free Foundation Stick, NATURAL BEIGE 220
جربت النوعين من فاونديشن فيت مي “السائل والستك” وكلهم نفس النتيجة واحس انه الستك مدة ثباته على البشرة اطول من السائل، واااايد سهل في التوزيع وما يتكتل وممكن تحطين اكثر من طبقة فوق بعض.
