Caudalie Polyphenol C15 || مجموعة كودالي بوليفينول سي ١٥ الجديدة

اشحالكم يا حلوات؟ اليوم بخبركم عن مجموعة العناية بالبشرة من ماركة كودالي Caudalie Polyphenol C15 ، والمجموعة اسمها بوليفينول سي ١٥ واللي بتطرحها ماركة كودالي الفرنسية في اسواق الامارات خلال شهر فبراير ٢٠١٥ في بوتس والصيدليات الكبيرة ومحلات سيفورا.

واجتمعت مع ممثلي الماركة وعطوني شرح وافي عن المجموعة اليديدة والمخصصة لمحاربة عوامل الاكسدة والتجاعيد. وتساعد هاذي المجموعة في المحافظة ع البشرة وحيويتها وفي نفس الوقت ما تحتاجين خطوات كبيرة او وقت طويل عشان تشوفين النتايج. المجموعة مستخلصة من ثمار العنب ومجموعة فيتامينات وحصلت ماركة كودالي براءة اختراع لها التركيبة اليديدة، ومخصصة للنساء في سن العشرينات والثلاثينات، يعني الافضل ان نحارب علامات التقدم في السن من وقت خصوصا في وقتنا الحين مع انشغالنا بالحياة والدراسة والشغل والحياة الاسرية.. وهالمجموعة تناسب كل البشرات حتى الحساسة.

بديت استخدم المجموعة من اسبوع وطبعا ما اقدر احكم عليها لين اخصلها، بس بشكل مبدئي لاحظت ان بشرتي استوت انعم وفيها حيوية اكثر.

المجموعة تتكون من:

Anti-Wrinkle Defense Serum

هذا السيروم تحطينه بعد ما تغسلين البشرة باي غسول انتي تستخدمينه، الصبح وفليل وميزته ان يتغلل في طبقات البشرة فالمفروض انه يشتغل عليها من الداخل. ما فيه عطر وخفيف بسرعة تتشربه البشرة.

سعر ال٣٠ مل - ٢٢٤ درهم.

Anti-Wrinkle Protect Fluid Broad Spectrum SPF20

كريم النهار تحطينه عقب السيروم ويساعد البشرة ان ما تطلع عليها تجاعيد يديدة ويخفف من التجاعيد القديمة، لاحظت انه خفيييف ع البشرة وميزته بعد ان فيه حماية من الشمس.

سعر ال٤٠ مل - ١٩٩ درهم.

Anti-Wrinkle Eye & Lip Cream 

كريم لمنطقة حوالين العيون والشفايف، يساعد على تخفيف الخطوط الرفيعة والسواد اللي في هالمناطق، وشوي يشدها.

سعر ال١٥ مل - ١٦٥ درهم.

Overnight Detox Oil 

الزيت الجاف لاحظت انه بسرعة تتشربه البشرة وما يخلي طبقة دهنية، ممكن تستخدمينه بروحة فليل او قبل السيروم، ولاحظت اني من بديت استخدمه انش ثاني يوم الصبح بشرتي وايد انعم.

سعر ال٣٠ مل - ١٨٩

فعالية ماركة كودالي School Of Beauty with Caudalie

اشحالكم يا حلوات؟؟ اليوم بخبركم عن فعالية كودالي اللي نظمتها ماركة كودالي في دبي لمجموعة من البيوتي بلوقرز والميكاب ارتست والمهتمات بمجال التجميل والعناية بالبشرة. بصراحة كانت فعالية جميلة فحبيت اشاركم بتفاصيلها.

الفعالية كانت في كافيه Fortnum & Mason في الداون تاون بدبي مول، رااااائع المكان وكان لنا مكان خاص في الطابق الثاني خذنا راحتنا فيه والخدمة ولا اروع.

في البداية رحبت فينا ناديا ممثلمة ماركة كودالي في الخليج

https://instagram.com/caudalie/

ونينا الجميلة من شركة العلاقات العامة الخاصة بتسويق ماركات عالمية مثل كودالي

https://instagram.com/quseqommunications/

كان الجو العام جميل بوجود هالحلوات واللي دعيتهم لحضور الفعالية،، وما قصرو لبو الدعوة:

https://instagram.com/reman_beauty/

https://instagram.com/fa6ameas/

https://instagram.com/theeloveofbeauty/

https://instagram.com/beautybyrody/

https://instagram.com/chat_with_hanan/

https://instagram.com/whatmaithasays/

https://instagram.com/homecooking/

https://instagram.com/petite_marawi/

 عرفتنا ناديا على تاريخ ماركة كودالي الفرنسية واللي موجودة من عشرين سنة وهي عبارة عن منتجات تهتم بالبشرة وتعالج مشاكلها المختلفة وحسب نوعية البشرة ممكن كل وحده تلاقى حل من كودالي.

 وميزتهم ان منتجاتهم طبيعية، و وااايد تعمتد على هالنقطة لدرجة ان فترة صلاحيتها من فتح المنتج نفسه ما تكون طويلة عشان تقل نسبة المواد الصناعية في هالمنتجات. واكيد ما عندهم تجارب على الحيوانات. وفوق كل هذا علبهم جداااااا راقية وانيقة. وعلى فكرة اغلب المنتجات مب معطرة او فيها روائح خفيفة جدا حسب تركيبة هالمنتجات.

طبعا انا مجربه وايد من منتجاتهم وشي ناسبني وشي ما ناسبني ومنزله كل تجارب عنهم على الانستجرام على حسابي

https://instagram.com/from_my_experience/

ووزعو علينا هدايا جميييلة، منتجات جربتها من قبل، ومنتجات يديدة نزلت في السوق هذا الشهر.

INSTANT DETOX MASK

هذا الماسك يديد نازل في ماركة كودالي الفرنسية، مهمته الاساسية تنظيف البشرة ويخلصها من الاوساخ المتراكمة والدهون، بعدني ما جربته وان شاء الله بس اجربه واكون رايي النهائي عنه بخبركم ع الانستجرام.

PARFUM DIVIN DE CAUDALIE

عطر يديد بعد نزل عندهم، ريحته مركزة بالمسك و الورد ولانه خالي من الكحول عادي اقدر ارشه مباشرة على الجلد ما يسبب تحسس او تغير لون الجلد. حبيته ريحته.

THÉ DES VIGNES SHOWER GEL & FRESH FRAGRANCE

من اروع منتجاتهم هالاثنينه، انا مجربتنهم من قبل الشاور جل وعطر الجسم. الريحة تجنننن وثابته اما الشاور جل فتنظيفه زين وما يجفف الجلد.

DIVINE OIL

هالزيت مثالي للجلد او الويه اوحتى الشعر، ميزته انه خفيف فبسرعه تمتصه البشرة او الشعر وما يخلي طبقة دهنية بس يرطب عدل.

BEAUTY ELIXIR

سبراي الويه هذا اللي خلاني احب ماركة كودالي من اكثر من سنة ونص!! رااااائع هالمنتج ودايما انصح كل وحده ما جربت شي من كودالي انها تجرب البيوتي اليكسر هذا. فيه طبقة زيت من فوق فلازم ترجين العلبة قبل وعقب ترشينه ع الويه وفيه ريحة خفيفة تذكرني بالسبا، مميزاته انه يرطب البشرة وينعشها عدل يعني استخدمه مرات الصبح ومرات فليل كجزء من روتين ترطيبي للبشرة، وبعد ممتاز لتثبيت المكياج يعني ارشه اخر شي ويثبته وما يخلي الويه يدهن.

روب السباحة، وجدا شكله انيق ومرتب.

ماركة كودالي موجودة في بعض افرع سيفورا والصيدليات الكبيرة مثل بوتس وابن سينا، ومتوفرة في اغلب دول الخليج.

My Empties #1 on Youtube || المنتجات اللي خلصتها #١ ع اليوتيوب

اشحالكم يا حلوات؟؟ هاذي المنتجات اللي ذكرتها في فيديو المنتجات اللي خلصتها واللي نزلته ع اليوتيوب. رابط قناتي

https://www.youtube.com/channel/UCmS4YkmUctwBdj3BQs7pZdg

Etude House hand bouquet hand cream

كريم اليد من ايتود هاوس، موجود عند التاجرة 

https://instagram.com/mim_shop/

Too Faced Cocoa Powder Foundation, Light / Medium

هاذي البودرة موجودة في محلات سيفورا دبي. وموجودة على موقعهم.

http://www.sephora.com/cocoa-powder-foundation-P387591?skuId=1625979

Laura Mercier 'Crème Brûlée' Eau Gourmande

هذا العطر موموجد بروايح مختلفة بس اللي ذكرته في الفيديو بريحة الكرامبروليه. اشتريه من ديبنهامز دبي وموجود من نوردستوم على هذا الرابط.

http://shop.nordstrom.com/s/laura-mercier-creme-brulee-eau-gourmande/2910725

innisfree olive real cleansing tissue

وايبس مزيل المكياج موجود عند التاجرة

https://instagram.com/etudehousedubai/

Carmex Original Squeeze Lip Balm 

مرطب الشفايف موجود على موقع امازون وهذا الرابط.

http://www.amazon.com/Carmex-Original-Squeeze-Balm-0-35/dp/B000R2Z740/ref=sr_1_11?s=hpc&ie=UTF8&qid=1428652828&sr=1-11&keywords=Carmex

Caudalie Polyphenol C15 Anti-Wrinkle Eye & Lip Cream

كريم العين من كودالي، موجود في اغلب الصيدليات خصوصا صيدلية بوتس وبعد في سيفورا. وهذا الرابط

http://www.sephora.com/polyphenol-c15-anti-wrinkle-eye-lip-cream-P386800

Ofrésia eau de toilette by diptyque

روووعة هالعطر وبتحصلونه على هذا الرابط

http://www.diptyqueparis.com/personal-fragrances/eau-de-toilettes/ofresia-edt.html

Shampoos & Conditioners - Keratin Complex

موجود هذا الشامبو في صيدلية بوتس، وحصلته على هذا الرابط بعد

http://www.keratincomplex.com/shampoos-conditioners.htm

Vaseline Healthy Even Tone Body Lotion

هالبودي لوشن موجود في الجمعيات وحصلته بعد على امازون

http://www.amazon.com/Vaseline-Healthy-White-Lightening-Lotion/dp/B00LLO6ENQ/ref=sr_1_5?s=beauty&ie=UTF8&qid=1428653467&sr=1-5&keywords=Vaseline+Healthy+Even+Tone+Body+Lotion

GLAMGLOW SUPERMUD CLEARING TREATMENT

هذا الماسك بالحجم الصغير خذته من سيفورا دبي، وحصلت الحجم العادي على رابط موقع سيفورا.

http://www.sephora.com/super-mud-clearing-treatment-P376409?skuId=1473735

Maybelline New York Volum Express Falsies Big Eyes Washable Mascara

الماسكارا موجودة في سنتر بوينت وصيدلية بوتس، وبعد على رابط موقع امازون

http://www.amazon.com/Maybelline-Washable-Blackest-Black-202/dp/B00D7BNGQO/ref=sr_1_1?s=beauty&ie=UTF8&qid=1428653704&sr=1-1&keywords=Maybelline+Volum%27+Express+Falsies+Big+Eyes+Mascara

Laura Mercier Tarte Au Citron Souffle Body Cream

كنت مشتريه الطقم كامل من ديبنهامز، بس حصلت الكريم بالحجم الكبير على هذا الرابط.

http://www.johnlewis.com/laura-mercier-tarte-au-citron-souffle-body-cream-200ml/p1881068

مفضلات شهر مارس ٢٠١٥ || March 2015 Favourites

اشحالكم يا حلوات؟ موضوع اليوم عن مفضلات شهر مارس وهاذي اكثر المنتجات اللي استخدمها هالشهر وحبيتها زيادة، وكالعادة اشاركم فيها:

Tom Ford 'Jasmin Rouge' Eau de Parfum

هذا العطر لمحبي ريحة الياسمين، ريحته ياسمين بس وااايد مركزة وقويه وثابته طول اليوم، احب بشكل عام العطور اللي راده على الزهور او التوابل ولازم تكون مركزة وهذا من العطور المتميزة بالنسبة لي.

Wet n Wild MegaLast Lip Color

ارواج ويت اند وايلد جميلة والوانها متنوعه وثابته، تركيبتها مطفية بس مرات تجفف الشفايف فافضل استخدم قبلها مرطب شفايف، غير عن جيه ما احس ان فيها عيب وعندي من هالارواج بدرجات متنوعه بس هالدرجتين اللي لاحظت اني وايد استخدمتهم هالشهر، اطلبهم من تاجرات الانستجرام واسعارهم بين ٣٠ او ٤٠ درهم للحبة.

lipobase cream

هذا الكريم للويه والجسم وترطيبه ممتاز، يعني من اقوى انواع مالمرطبات اللي استخدمتها وعادة استخدمه يوم احس ان بشرتي جافة ومهما حطيت مرطب اتم جافة فهذا المرطب انسب شي، ويتم ترطيبه طول النهار ما احتاج اني ارد احطه. اشتريه من الصيدلية.

Sephora Keep Black 01 Waterproof Liner

هذا الجحال او الكحل من سيفورا كان من ظمن الهدايا اللي يعطونها لاصحاب بطاقات سيفورا، فما اشتريته لكن من يخلص اكيد برجع اشتري منه لان ثباته واااايد زين، سواء داخل العين او على خط الرموش، مرات احب اموهه على خط الرموش ومن يجف خلاص يثبت واحس به ووترفبروف صدق، لكن طبيعة عيوني ما ادمع وايد فاللي عندها هالمشكة مب متاكدة اذا بيناسبها هالجحال والا لا.

MAC Mineralize Skinfinish in Global Glow

هاذي الاضاءة من ماك ثباتها زين وشكلها طبيعي وناعم ع البشرات الحنطية، احبها استخدمها للنهار لانها خفيفة تعطي لمعة ناعمه مب قوية مثل سوفت اند جينتل. طلبتها من تاجرة ع الانستجرام واتوقع موجودة في محلات ماك بس مب متاكدة.

Vichy Bi-White med eyes deep whitening illuminating concentrate

كريم لتفتيح الهالات السودا، وفعلا لاحظت انه خففها نوعا ما، استخدمه مع اي كريم anti aging او مرطب لها المنطقة لان هالكريم بروحه ما يرطب. بس زين لتفتيح الهالات.

اشتريته من الصيدلية

GLAMBOX February 2015 || جلام بوكس فبراير ٢٠١٥

اشحالكم يا حلوات؟ اليوم بخبركم عن علبة جلام بوكس واللي كنت مشتركة وياهم العام. ما جددت اشتراكي لاني انشغلت بسفراتي فقبل فترة تواصلو وياي وعرضو عليي ان كل شهر يطرشولي العلبة عشان اجربها وشاركم رايي فيها، وطبعا وافقت!

والاحلا من كل هذا ان عندي لكم خصم عبارة عن كود GLAMSUMAIA اذا حابه تشتركين في جلام بوكس، وباختصار جلام بوكس عبارة عن اشتراك شهري وتوصلج كل شهر علبة فيها حوالي خمس منتجات مكياج او عناية بالشعر او بالبشرة او بالجسم، مرات يكون حجمها كبير ومرات ديلوكس سامبل وبعد في العلبة قسائم خصومات خاصة بالمنتجات اللي موجودة او مطاعم وصالونات.

رابط الاشتراك تحت ويا كود تقدرين ادخلينه في اخر نقطة في الاشتراك وتحصلين خصم حوالي ١٥٪ يوم تشتركين.

https://www.glambox.me/ae-en/account/login?sid=31710

Voucher Cod : GLAMSUMAIA

Nivea cocoa butter body lotion

لوشن للجسم من نيفيا حبيت ريحته وتركيبته خفيفة، ما جد جربت من قبل هاللوشن من نيفيا ففرصة اجربه وبخبركم برايي فيه.

swissdent whitening toothpaste

ماركة اول مرة اسمع بها، بس حلو ان حاطين في هالشهر معجون اسنان وحجمه وايد زين خصوصا للسفر.

ESCADA Joyful Eau de Parfum

سامبل لعطر اسكادا اليديد، ريحته تجننننن وشميتها اول ما فتحت العلبة، مع انه مغلق السامبل بس ريحته منتشره داخل العلبة، عيبني وايد وافكر اشتريه. والسامبل خليته لشنطة اليد.

NIVEA SUN Protect & Refresh

سبراي الحماية من الشمس من نيفيا، نسبة الحماية فيه ٣٠٪ واحس بها ممتازة خصوصا ان داخلين ع الصيف وموسم التان. بعطيه لاختي لاني ما اسوي تان وهيه تحب هالسوالف!

glam gals matte long lasting lipgloss, LIM01

روج مطفي من ماركة جلام جالز، ما جد جربت هالماركة مع اني شفتها ع الانستجرام اتوقع بعض التاجرات يبيعونها. المهم اللون حلو وعملي وعيبني بس بجرب اذا هو يجفف الشفايف والا لا.

مفضلات شهر فبراير ٢٠١٥ || February 2015 Favourites

اشحالكم يا حلوات؟ ادري شوي اتاخرت في مفضلات شهر فبراير بس اخيرا اتفيجت وكتبت عنهم! فتعالو خل اراويكم شو اكثر شي استخدمته من المنتجات خلال اقصر شهر في السنة! على فكرة ترا اغلب المنتجات عندي اياها من قبل يعني مب يديدة بس استخدمتها وايد خلال فبراير.

St. Ives Naturally Soothing Oatmeal & Shea Butter Body Lotion

رااااائع هالكريم من ناحية الترطيب، خفيف ويمتصه الجلد بسرعة ويخليه مترطب طول اليوم، مافيه عطر او ريحة فاحب اقطر فيه شوية عطور زيتية سواء عربية مثل دهن العود والمسك او من عطور بودي شوب الحلوة.

اشتريته من السوبرماركت.

Diorskin Star Foundation, 033

هالفاونديشن من ديور تغطيته متوسطة وثباته وااايد زين ع البشرة، احب اثبته باي بودرة حرة شفافه ويطلع شكله حلو ع البشرة. بشرتي عادية إلى مختلطة وناسبني هالفاونديشن.

مومجود في اي ستاند يبيع منتجات ميكاب ديور.

Micaroon make up cream blushers

-Rosa

-Ashq

بلاشرات كريمية ممتازة وناعمة، حبيت اني عادي استخدمها فوق البودرة وما تتكتل وتركيز الوانها قوي يعني احتاج شي بسيط منها ويبين عدل ع الويه. وصلني هدية منهم وهذا موقعهم.

http://www.micaroon.com/

Kiko Cosmetics Ultimate Pen Long Wear Eyeliner

ايلاينر كيكو اشتريته من محلهم في لندن، سعره اظن ٦ باوند وتركيبته زينه يعني اسود غامج وسهل لرسم خط الايلاينر ومن ينشف خلاص يثبت، وفوق كل هذا عادي ينشل باي مزيل ميكاب. حبييييته.

Mizon Special Therapy Honey Black Sugar Scrub

حلو هالسكراب لانه ينظف البشرة عدل وفي نفس الوقت يرطبها، يعني احط منه شوي على ويهي واسوي مساج خفيف مدة دقيقتين تقريبا وعقب اغسل ويهي ويتم مترطب وحلو. استخدمه مرة او مرتين ف الاسبوع ووصلني من هالتاجرة ع الانستجرام

https://instagram.com/uae_korea/

smashbox photo finish primer pore minimizing

هالبرايمر احسب به انسب للبشرات الدهنية من جيه بس احطه ع الانف وحوالينه، لان هالمنطقة عندي عليها شوية مسام وادهن مرات فيوم استخدم هالبرايمر وااايد يفرق عندي الفاونديشن، يخلي المنطقة صافية وما ادهن والفاونديشن ثابت. اشتريته من سيفورا وللاسف غالبا مخلص يعني ما صدقت اني حصلت هالحبة!

Bourjois Rouge Edition, 05

جمييييل هاللون ومن ارواجي العملية اللي ما يطلع من الشنطة، تركيبته شوي مطفية بس ما يجفف الشفايف وثباته زين، شي منه اظن ١٢ درجة او اكثر وعندي ٤ درجات لكن هالدرجة المفضلة عندي ودوم استخدمها.

موجود في محلات بوتس وسنتر بوينت.

Caudalie Polyphenol C15 Anti-Wrinkle Eye & Lip Cream

رااائع كريم حوالين العيون هذا من كودالي، ممكن تستخدمينه بعد لحوالين الشفايف بس انا عيبني لحوالين العيون وصدق يرطب هالمنطقة ويخليها ناعمه، خفيف بسرعة تتشربه البشرة واحب استخدمه الصبح وفليل. وصلني من ماركة كودالي بس موجود في الصيدليات الكبيرة وبعض افرع سيفورا في الامارات وقطر والكويت.