My Empties #8 || #المنتجات التي انتهيت منها ٨

السلام عليكم، اليوم يايبتلكم الجزء الثامن من المنتجات اللي خلصتها هالفترة، احب هالسلسلة لانها تعطيني مجال اتكلم عن المنتجات اللي جربتها ورأيي فيها وهل برجع اشتريها والا لأ.

Bath Body works Merry Marshmallow Kiss Body Lotion

هالكريم من مجموعة الأعياد من باث اند بودي موركس، ريحته تجنن وثابته طول اليوم، وترطيب الكريم بعد وايد زين، مع اني عادة في الشتا احتاج لترطيب اكثر لان الجو البارد يجفف الجلد بس بعد هالكريم كان زين. لو موجود منه اكيد برجع اشتريه.

Very Sexy Now 2014 Victoria`s Secret Perfume and Body Spry

هالعطر نزل ليمتد ايدشن في فكتوريا سيكرت وخلص، ميزته ان ريحته مركزة مب مثل عطور فيكتوريا سيكرت اللي ما تثبت وايد، والبودي سبراي بعد ريحته قويه وحجمه كبير فطول عندي. للاسف انهم خلصو واتمنيت لو ماخذه منهم زيادة. اذا نرل مرة ثانية اكيد برجع اشتريه سواء العطر او البودي سبراي واظن باخذ المجموعة كلها.

The Body Shop Brazil Nut Body Scrub

سنفرة الجسم هاذي مستخدمتنها من قبل ومن المفضلات عندي لانها تشل الجلد الميت بدون ما اتأذي الجلد، وترطبه شوي خصوصا ف الشتا احس هالنوع من السنفرات ممتاز، وريحتها حلوة خفيفة. اكيد برجع اشتري منها.

OPI Avoplex Nail and Cuticle Replenishing Oil

زيت لترطيب اجلد اللي حوالين الاظافر وتقوية الاظافر، يعيبني هالزيت ولاحظت ويا الاستخدام اليومي كل ليلة انه الكيوتكل او الجلد اللي حوالين الاظافر ارتب وما يتقطع او ينشف، واظافري بعد استوت اقوى عن قبل. رجعت اشتريت علبتين من نفس الحجم وموجود هالزيت في محلات نزيه. شي منه بحجم اكبر بس ماحبيت اني اشتريه لان من افتح العلبة بيدخلها الهوا واحس الزيت بيتاثر اسرع، فالحجم الاصغر بخلصه اسرع وما بيتاثر مثل الكبير اللي بطول لين اخلصه. ما ادري هاذي وجهة نظري!

L'OREAL PARIS False Lash Butterfly Wings Mascara

هالماسكارا بلون ازرق غامج، من الماسكارات اللي احب استخدمها وجربت منها السودا بعد حلوة، اطول الرموش وتعطيها كثافة طبيعية. ممتازة لاستخدام يومي واكيد برجع اشتريها.

Bath and Body Works Apricot & Honey Body Souffle 

هذا الكريم من باث اند بودي وركس ريحته تجننننننن، للاسف نزل فترة وخلص وما كنت اعرف انه ليمتد ايدشن. بس اكيد بيرجع ينزل لان دايما يكررون منتجاتهم. من ينزل اكيد برجع اشتري منه.

Burberry Sport Perfume for Women

من العطور الحلوة اللي جربتها، ريحته ثابتة وعيبني بس ما رجعت اشتري منه لان حابه تجرب انواع ثانية يديدة.

Charlotte Tilbury FULL FAT LASHES GLOSSY BLACK mascara

احبهاااااا هالماسكارا ومن احسن الانواع اللي جربتها لين الحين، تعطي غلظ وطول للرموش بطريقة طبيعية وما تتكل. بشكل عام منتجات ماركة شارلوت تيلبري من استغني عنها. وعندي من هالماسكارا باك اب كمن حبة!

My Empties #7 || #المنتجات التي انتهيت منها ٧

اشحالكم يا حلوات؟ من فترة ما نزلت موضوع عن المنتجات اللي خلصتها هالفترة لان انشغلت بالسفر وللاسف منتجات وايده خلصتها بس ما قدرت احتفظ بالعلب الفاظية، فاغلب هاذي العلب من فترة موجوده في الكيس!! بس اتذكر شو اللي حبيته منها وشو اللي ما ناسبني.

la vie est belle lancome body lotion

رووعه ريحة هالكريم، ترطيبه بعد زينه بس ريحته اللي خلتني اشتريه بصراحه!! ما جربت العطر بس اكيد برجع اشتريه.

اشتريته من السوق الحرة على ما اظن.

zara home dark amber candle

شمعة من محل زارا هوم، بصراحة ما حبيتها لان ما فيها ريحة!! لين ما خلصت ما طلعت ريحة مع اني جربت احطها في غرفة صغيرة بس بعد ما طلعت اي ريحة فاكيد ما برجع اشتريها.

lush ro's argan body conditioner

واااايد حبيت هالكونديشنر من لاش للجسم وتكلمت عنه في الانستجرام. ريحته وايد حلوة وترطيبة ممتاز. استخدمه كخطوة اخيرة في الشاور لترطيب الجسم.

وطبعا رجعت اشتريت منه.

human heart nature 100 natural hand and foot salve

هالكريم وصلني ضمن مجموعة من تاجرة ع الانستجرام اسمها @produit_natural عشان اجرب المنتجات اللي عندي، كل شي لين الحين جربته حبيته وهالشي نادر بالنسبة لي خصوصا في منتجات العناية بالجسم والشعر. بس هالمنتجات فعلا حسيت بها طبيعية وترطب اليد والقدم عدل. وريحة الكريمة حللللوة. كنت استخدمها فليل قبل النوم.

اكييد برجع اطلب منها.

urban decay b6 vitamin infused spray

هذا السبراي مب مثبت مكياج، او بالنسبة لي ع الاقل، بس استخدمته كجزء  من عنايتي ببشرتي ووايد نفعني، يرطب البشرة الصبح وفليل ويخفف احمرارها، خصوصا اني في السفر تجف بشرتي وايد وساعدني هالسبراي على ترطبيها ويخفف احمرار البشرة بشكل بسيط.

اشتريته من سيفورا واكيد برجع اشتريه.

beauty buffet white collagen bright and firm body essence

بعد هذا الكريم طلبته ضمن مجموعة من تاجرة ع الانستجرام اسمها @hindgallery واكثر شي حبيته في هالمجموعة ترطيبها، اما من ناحية التفتيح او التبييض فلاحظت انها وحدت لون الجلد بشكل عام بس مب هاكي الفرق، او يمكن لان ما عندي مناطق غامجة فما لاحظت وايد فرق.

برجع اطلب منها اكيد لان حبييييت ترطيبها.

penhaligon's artemisia perfume

هاذي ثاني علبة من هالعطر!! ريحته فرش وناعمة. اخذه عادة من لندن بس موجود محلهم في دبي مول، جربت منه بعد الشاور جل وكلهم ريحتهم ثابتة طول اليوم. بشكل عام عطور هالماركة وااايد ثابته يعني ما احتاج ارش منها وايد وارجع اشتري منهم.

dermalogica daily microfoliant

ممتاز هالمقشر الخفيف للبشرة، اخلطه ويا الالغسول واقشر البشرة بشكل خفيف يعني ما يأذي البشرة. مكتوب عليه انه يناسب الاستخدام يوميا بس انا احب استخدمه بين يوم وترك. اظن هاذي ثالث علبة منه في هالسنة!! واكيد برجع اشتريه.

caudalie crushed cabernet scrub

هاذي الصنفرة من احسن الانواع اللي جربتها. مب خشنة بس في نفس الوقت تشل الجلد الميت وتخلي الجسم ناعم. وبعد ريحتها زينه وبرجع اشتريها.

موجودة هالماركة في صيدلية ابن سينا في دبي.

My Empties #6 || #المنتجات التي انتهيت منها 6

السلام عليكم،، اليوم يا حلوات يابتلكم الجزء السادس من سلسلة المنتجات اللي خلصتها خلال هالفترة ورايي فيها:

Syoss Shine Boost Hair Mask

ماسك الشعر هذا مخصص للشعر اللي فقد لمعته، جد جربت نوع ثاني من نفس الماركة بس حسيت هذا تأثيره احلا، احطه على شعري بعد ما اغسله واخليه تقريبا خمس دقايق عقب اغسله، ووووووايد حلو من ناحية اللمعة والنعومة بس ما لاحظت انه يغذي الشعر او يطوله. اشتريته من السوبرماركت.

scentio white collagen facial foam

غسول الوجه هذا اشتريته من اطيب واحلا تاجرة ع الانستغرام @hindgallery واشتريت وياه مجموعة كاملة للجسم بعد، حبيت انه ينظف البشرة من الخاطر خصوصا اذا كانت وايد دهنية ويصفيها ويوحد لونها، وناويه ان شاء الله ارجع اطلب منه.

Lush Rub Rub Rub Scrub

جميل هالسكراب الازرق من لاش، صدق ينظف الجلد وينعش وريحته حلوة بعد، نزلت عنه ريفيو بالتفصيل ع الانستجرام ورديت اشتريت منه مرة ثانية من كثر ما حبيته. اشتريته من محل لاش.

palmers cocoa butter formula moisturising body oil

زيت ترطيب الجسم من بالميرز ممتاز لترطيب الجسم خصوصا للمناطق الجافة، احطه عقب ما اغسل جسمي واخلص، اوزعه عالجسم واخليه شوي وعقب اغسل الزايد تحت الشاور. الشي الوحيد اللي ما عيبني فيه ريحته، هي عادية بس ما عيبتني وايد. اشتريته من السوبرماركت.

shu uemura ultimate expression mascara

جميييلة هالماسكارا لانها تعطي غلظ للرموش وتفرقها ويوم ابا اخوزها فبكل سهولة وما اثرت الحمدالله على رموشي. اشتريتها من محل سيلفرجز في لندن.

Caudalie beauty elixir

ممتاز هالسبراي لتثبيت المكياج وحتى بدون مكياج يعطي انتعاش للبشرة ويخليها جيه فرش. ريحته مثل الراوئح الموجودة في السبا ووايد تعيبني، من قمت استخدمه من كمن شهر وانا ما ادري عن مثبت المكياج اللي من ايربن ديكاي لان احس هذا طبيعي اكثر. اشتريته من فرنسا ورديت اشتريته من صيدلية ابن سينا في دبي وموجودة منتجات ماركة كوديل في بوتس بعد.

the body shop lip exfoliator

مقشر الشفايف من ذا بودي شوب استخدمته وايد بس دايما انسى احط العلبة الفاظية في المنتجات اللي خلصتها!! مشكلة هالمقشر انه كميته شويه فبسرعة يخلص للاسف، والا هو ممتاز، احطه فليل ع الشفايف وارقد به والصبح امسح شفايفي واغسلها وتكون وايد ناعمة وممتازة لاي روج خصوصا اذا كان مات او مطفي. اشتريه من محل ذا بودي شوب.

My Empties #5 || #المنتجات التي انتهيت منها 5

اشحالكم يا حلوات؟ اليوم اكمل وياكم سلسلة المنتجات التي خلصتها خلال الفترة اللي طافت، احاول اني اختصر بعدد المنتجات اللي استعرضها عشان ما يكون الموضوع طويل فخل نبدا:

CLEAR Anti Dandruff Shampoo, Ice Cool Menthol

هالشامبو دايما ارجع له لانه يخفف القشرة من شعري بدون ما ينشفه، وااايد احب هالماركة ودايما ارجع لها، والحمدالله قشرة شعري موسمية يعني مب بشكل دايم فيوم يكون شعري مافيه قشرة استخدم هالشامبو مرة في الاسبوع عشان يمنع رجوعها، واذا كانت عندي قشرة فاستخدمه ويا كل غسله!

Garnier Body Ultimate Beauty Oil. 

زيت الجسم من غارنييه كنت ماخذه منه في سفرتي الاخيرة للندن، خلصت اظن ثلاث علب منه لان ترطيبه كان حلو وخفيف مع انه زيت بس الجسم يمتصه على طول وما يخلي طبقة زيتية. يا ليت لو اييبونه عدنا في دبي.

diptyque eau duelle

رااااائع هالعطر وكل ما يخلص لازم ارجع اخذ منه، بشكل عام هالماركة من الماركات اللي وااايد احب عطورهم وكريماتهم وحتى شموعهم. والحلو انها موجودة في دبي مول بس انا ماخذه العطر من لندن.

Bath & Body Works mad about you body lotion

حلوة ريحة هالبودي لوشن واتم ثابته طوووووول الوقت بس من ناحية الترطيب احس انه مب هاكي الزود، لكن الريحة تشفع له !!

they're real mascara from Benefit

هاذي الماسكارا كل ماتخلص لااااازم ارجع اشتري منها لانها من الاساسيات بالنسبة لي ووايد اتكلمت عنها في الانستجرام. وهالمرة اتذكرت اني اصورها قبل ما اعقها.

My Empties #4 || #المنتجات التي انتهيت منها 4

اليوم هو الموضوع الرابع من سلسلة المنتجات التي انتهيت منها مؤخرا، واحب التحدث عنها لاعطائكم فكرة واضحة عن تجاربي مع هذه لمنتجات.

كريم الجسم من خلطات، اسمه ليبي

هذه الماركة موجودة في كشكات موزعة في اغلب مولات دبي ولديهم كريمات ودخون بعطور جميلة. هذا الكريم كان هدية من والدتي الغالية ولقد احببت رائحته القوية لذا كنت اخلطه مع كريم عادي لتخفيف قوة العطر ومن حيث الترطيب فهمو جميل وبالتأكيد ساعود لشرائه وقد اجرب منه بعطور اخرى.

Paris Daydream Candle from Bath & Body Works

اشتريت مجموعة من شموع باث اند بودي وركس بالحجم الصغير هذا حيث كانت ضمن عروض شهر رمضان وسعر الحبة ٢٥ درهم الا ان بعضها مثل هذه الشمعة عديم الرائحة! وانتهت بسرعة دون ان تنبعث منها اي رائحة والبعض الاخر كانت روائحهم نفاذة.

BB Cleanser from SKIN79

هذا الغسول الكوري الجميل الذي طلبته من تاجرة على الانستجرام وقد لاحظت اثناء استخدامه انه يساعد على تصفية البشرة وتنظيفها بعمق دون ان يجففها لذا ساشتري منه مجددا.

Angel Perfume Hair Mist

عطر الشعر من ماركة انجل ورائحته مركزة لذا ارش منه القليل على شعري واحب رائحته المركزة. بالتأكيد ساشتري منه واعتقد ان هذه ثالث علبة استخدمتها حتى الآن!

Macadamia natural oil deep repair masque 

هذا ماسك الشعر بزيت المكاديميا من افضل ماسكات الشعر التي جربتها حتى الآن ولقد تحدثت عنه كثيرا في حسابي على الانستجرام حيث ترطيبه ممتاز دون ان يترك طبقة دهنية على الشعر.