تجربتي مع نظام الريجمن لعلاج حب الشباب Update

اشحالكم يا حلوات؟؟ 

قبل كمن شهر تكلمت بالتفصيل عن نظام الريجمن لعلاج حب الشباب وكتبت بالتفصيل المنتجات اللي استخدمها و روتيني للصباح والمسا، بتحصلون الموضوع في هذا الرابط

http://frommyexperience10.blogspot.ae/2014/05/regimen-from-acneorg.html

واليوم بخبركم عن نتيجة النظام: 

-استخدمته لمدة ست شهور بالظبط وهاذي هي المدة المحددة لاستخدام النظام بالكامل صبح ومسا. طبعا دخلت اشياء ثانية في النظام وكل شي ذكرته في الموضوع الاولي واللي موجود في الرابط فوق.

-نتيجة النظام ممتازة، اختفت الحبوب من ويهي بالكامل وحتى علاماتها. كنت اصور ويهي كل اسبوع اول شهر، ومن الشهر الثاني مرة كل شهر عشان اقدر اقيس التطور. بس فعلا النتيجة ابهرتني. وعلى فكرة الحبوب تطلع لي بشكل عام من التوتر وبشرتي من ايام المراهقة تميل انها اطلع حبوب بس بشكل عام اسيطر عليها. نظام الريجمن اول مرة اجربه ونفع وياي. ومن خلصت مدة الست شهور حولت على كريمات وغسول اخف وبتكلم عنهم قريبا ان شاء الله.

-اهم شي الانتظام والالتزام بهالنظام، اول شهر كان اصعب شهر لان واااايد جفت بشرتي وقامت تطلع الحبوب اللي تحت الجلد، حبوب ويهي ماكانت قوية بس بعد مب خفيفة وكانت على كل الويه. وكنت عادي اقدر احط المكياج على ويهي بس فالبداية كان ويهي واااايد يجف وعقب اول شهر رد عادي. وبشكل عام انا ما احط المكياج بشكل يومي.

-بصراحة انصح بها النظام اذا انتي وحده عندج صبر وطولة بال. النتيجة تبهر وتستاهل ان اشتغل على بشرتي لان ف النهاية هذا جزء مهم من جسمي ولازم اهتم به. وميزة هالنظام انه عبارة عن غسول وكريمات يعني لا حبوب ولا ادوية.

-المنتجات انا شارتنها بفلوسي يعني مب اعلان لها المنتجات وقررت اجربه بنفسي عقب ما قريت عنه و دورت عنه بالتفصيل، وطلبت المنتجات من موقع acne.Org وموجودة بعد على موقع امازون.