وخلص شهر سبتمبر الحلو وبدينا في اكتوبر، هالشهر شوي اتاخرات في هالموضوع لاني انشغلت ويا تجهيزات العيد، عساكم من عواده.
Duchess Quad eyeshadow from MAC
هالباليت من مجموعة اوزبورن والوانها وايد احبها وبالنسبة لي عملية، خصوصا يوم اكون محتارة ومب عارفة شو الالوان اللي استخدمها، على طول اطلع هالباليت ودايما يطلع اللوك حلو.
UV PLUS HP, SPF 40 , Day Screen from Clarins
كريم الحماية من الشمس هذا وااايد احبه وارتاحت بشرتي عليه، اتكلمت عنه من قبل ع الانستجرام وما استغني عنه ابدا، ما يخلي طبقة ع البشرة ولا يسد لي المسامات او حسست منه وعادة اغلب كريمات الحماية تسبب مشاكل لبشرتي ما عدا هذا وكم نوع ثانيين، بس هذا المفضل عندي.
max factor excess volume extreme impact mascara
هاذي الماسكارا من اكثر من شهر استخدمها ووايد حبيتها لان الفرشاتين اللي فيها ممتازات لتطويل الرموش وتعطيها غلظ، اتكلمت عنها الاسبوع اللي فات ع الانستجرام ولاحظت ان اغلب تعليقات البنات ان هاذي الماسكارا سببت تساقط رموشهم، بالنسبة لي ما لاحظت هالشي وطبيعي من وحده للثانية تختلف التجربة.
CHANEL PERFECTION LUMIÈRE, LONG-WEAR FLAWLESS FLUID SUNSCREEN MAKEUP
BROAD SPECTRUM SPF 15. 40 BEIGE
هالفاونديشن من شانيل استخدمه من زمان بس هالشهر رديت استخدمه اكثر، وفعلا ثباته طول اليوم وتغطيته متوسطه لكن ما يبين انه ثجيل ع البشرة، احس انه يناسب البشرات الجافة إلى المختلطة لان ما يعلق بالاماكن الجافة ع البشرة ويرطبها شوي.
Lancome tresor midnight rose perfume body lotion
جميييييلة ريحة هالبودي لوشن، وايد حبيتها بس ماجربت العطر اللي ويا هالكريم، اما من ناحية الترطيب فلا باس فيه وهاللي يخليني اخلطه ويا كريم جيرجنز عشان ازيد نسبة الترطيب، لكن الريحة تجننن وافكر ارجع اشتري منه علبة ثانية!
Bobbi Brown Eye Blender Brush
ممتازة هاذي الفرشاة لدمج الايشدوهات او تمويه اطراف رسمة العين، وسهلة في التنظيف وتنشف بسرعة، من احسن انواع فرش الاليشدو اللي جربتهم.
La Prairie Cellular Treatment Gold Illusion Line Filler
هذا برايمر ويعطي لمعة رااااااائعة للبشرة، استخدمه قبل المكياج والمفروض انه يعبي الخطوط الرفيعة ع الويه وبصراحة ما لاحظت هاكي الفرق من هالناحية يمكن لان ما عندي خطوط رفيعة باينه، بس من ناحية تثبيت المكياج وانه يعطيه لمعه فممتاز هالكريم. للاسف سعره شوي غالي بس يتم فترة طويلة لان ما استخدم منه غير كمية بسيطة كل مرة.
MAC gold deposit mineralize skinfinish
اضاءة ماك هاذي موجودة في الكوليكشن الدائم بس خذتها من سويسرا لانها نزلت في الباكجنج اليديد وبعدها ما نزلت عدنا في الامارات، حبيت العلبة اليديدة بس اللي عيبني اكثر اكيد البودرة نفسها. وايد تناسب البنات الحنطيات والسمر لانها تعطي لمعة طبيعية ذهبية تجننننننننننن وثابته طول اليوم. اللي تحصلها نصيحتي انها ما تفوتها.
No comments:
Post a Comment